AhmedGalal

التعريف بالشاعر

الاسم : محمد السيد توفيق

الميلاد : مارس 1983

بكالوريوس الفنون الجميلة عام 2005

شارك فى معارض عديدة

من مؤسسى جماعة اللقطة الواحدة

نشرت له أعمال فى مجلة “كاف كاف ” التركية و مجلة نوونة و تووت و كاريكاتير و جريدة الدستور المصريةو آخر ساعة

يعمل حالياً رسّام بمجلة ( بـاسـم ) السعودية منذ 2006 و حتى الآن

ايه الحاجه الي حابب الناس تعرفها عنك سواء شخصيا أو في الشغل ؟

بالنسبة ل شغلى كذا مرة اتسأل انت عملت ده ازاى !؟ فاجابتى الوحيدة بتكون ارسم وادخل عالحاسب الآلى و ألوِن على فوتوشوب

والشخصية :بما ان انا متجوز من سنة تالتة كلية و ربنا رزقنى ب عمر فى مشروع التخرج

كان الناس عايزة تعرف اية اللى انت عملته ده !؟مع نظرة دهشة و شك

فباقنعهم بفوايد و جمال الجواز بدرى قبل بأة ما تتعك فى الشغل و مسئوليات الحياة اللى لا تنتهى أبدا

الحق اعمل حاجة صح ف حياتك قبل ما حاجة تانية تشغلك و تتعك فيها و كده كده كل الحاجات دى

ح تعملها ح تعملها

بتعمل ايه لما بيجيلك شغل ضد مبادئك او فيه شبه نوعا ما ؟

هاحاول أتكلم مع اللى عارض الشغل عليّا لو نفع مايكونش فيها حاجة حرام كان بها ما كانش خلاص أرفض و أعتذر بكل هدوء و ذوق عن الشغلانة

بس أنا لحد دلوقتى ما اتعرضش عليا أبدا شغل حرام و الحمد لله ( لا تتمنوا لقاء العدو) ودي أقل رد جميل لربنا اللى زى ما رزقنا موهبة و قادر ياخدها لما أصحى من النوم فى غمضة عين, ايدك هيّا هيّا ايد ملايين البشر, كلنا ايدينا واحدة بس اللى ختلف علاء عن بهاء فيه الفطرة اللى ربنا وهبهاله بس كده

الدين يا محمد أثر في شغلك ؟

جدااااااااااااا, بص انا ما حبش حكاية دين أو مش دين بمعنى المفروض ان الاصل فينا الدين يعنى ده شئ طبيعى اللى مش طبيعى التانى اللى بيحاول يتعارض مع دينه

و الاخلاق الدين بيعتبر شئ مهم جدا جدا فى حياة أى انسان ما بالك انت فينا احنا اللى جزء كبير من موهبتنا و شغلنا قايم على ملاحظة البيئة و الكون و الناس و كل تفصيلة حوالينا عشان نقدر نقدم لها حلول من خلال رسمنا و تصميماتنا اعتقد الملاحظة دى بتزود ايمانى أوى باللى خلقنى

إزاي اكتشفت موهبتك ؟

كنت زمان و أنا صغير فى سن الحضانة كنت بشوف والدى بيرسم و كان بيعجبنى أوى ان قلم بسيط جدا ممكن تطلع منه رسومات حلوة

او تنقل اللى بتشوفه حواليك على ورقة فعجبتنى الفكرة والدى لقانى مهتم بالموضوع جابلى كراسة من بتاعة المربعات الصغيرة جدا دى

عارفها الكراسة الكبيرة بتاع الرسم البيانى دى عارفها جابهالى وفاكر لسه رسمة كنت رسمتها فيه بطول الصفحة رسمة ل بنت بشعة كده

بس كنت حابب أوى انى عرفت أرسم حاجة وكانت بالقلم الجاف الازرق ده كان ف ابتدائى مش فى حضانة طبعا وحبيت الرسم اكتر لما كانوا المدرسين يطلبوا نعمل لوحات للفصل عشان تتعلق و بتاع طبعا مش كنت انا اللى بعملها المهم كان ابويا يقوللى ماشى أنا هاعملهالك و اقعد جمبو و هو بيرسم يرسم بأة وزة على بطة على معزة

حاجات بسيطة كده كان بيرسمها بأسلوب بسيط أوى و أمى حببتنى جدا ف الخطكان خطوطها حلوة جدا خلصت ابتدائىخشيت ف اعدادى كانوا اصحابى يقولوا لى ما تاخد ارسم لنا ميكى كدهو ألم كرايسهم و ارسم لهم في البيت ميكى ماوس! بعد كده خشيت على اعدادى وربنا ييسر لى مدرسة رسم بتحب شغلها جدا ,زى ما تقول دى اللى فكرتنى انى بحب الرسم على ما روحت ثانوى خشيت ثانوى ماكانش فيه غير هما حاجتين بأكون موجود فيهم أوضة التربية الفنية و السور اقضى طول اليوم ف الاوضة رسم بأة وخفر ع الخشب و طباعة ع القماش وعيشة عيييشة أخلص أطلع ع السور أنط النطة التمام هوب هوب بقيت بره

و لكم جزيل الشكر

:وعندي قصة طريفة عن إزاي التحقت بفنون جميلة

من شروط انك تلتحق بفنون جميلة شرطين انك تجيب المجموع بتاعه تجيب لائق فى امتحان القدرات امتحان القدرات ده لازم لازماً ولا بد تجيب ” لائق “

جيت فى يوم وانا فى تالتة ثانوى جه مدرس قال يا جدعان اللى عايز يخش امتحان قدرات يدفع 11 جنيه تمن التسجيل

حسست على جيبى كده لقيت الفلوس فى جيبى مش فاكر 4 جنيه و لا 11 جنيه المهم انا و الله لا اعرف حاجة اسمها قدرات ولا حتى ( أنا آسف جدا لجهلى ) ولا كنت اعرف ان فيه  حاجة اسمها فنون جميلة أساسا

المهم امتحنت القدرات و كان الموضوع عن كيف احتفلت مصر بدخول القرن الحادى و العشرين

رسمت لك بأة يا معلم الاهرامات و عليها سمك وليزر ولا حرب الكواكب مش اللى كانوا جايبين الراجل المشعوذ ده أيامها

ده كان تهريج يا عم

ده الراجل تقريبا كان جاى فاهم انه جاى يعمل احتفال بالألفية فى مدينة البط

مش فى مصر أبدا

!!!!!!

المهم عملت جو حلو الصراحة ليل خارجى بأة و اهرانمات و ضوء من هنا و ضلمة من هنا و ناس مهيصة المهم ظبطت الدنيا  و الله و الله ماكنت اعرف ان امتحان القدرات ده عشان فنون جميلة ,انا كنت فاكره حاجة تزود الدرجات

!!!!!!!

:إمتى بيجيلك إلهام

:هما 3 حالات

1 -

بعد ما اتعرض لموقف أحس فيه بالسعادة جدا

2 -

لما اكون مضغوط جدا

3 -

لما كون قاعد باسمع الراديو ( و خاصة محطة البرنامج الثقافى ) أوبرا بأة و بتاع و كلام ف الكتب و هتش كده

بجد بجد ………. باعمل أحلى دماغ عشان كلام مالوش أى لازمة

!!!!

مين احسن 3فنانين عالمين واحسن 3 عرب او مصريين

:بحب جدا

رمبرانت

فان جوخ

ZEP

: المصريين

محمد شناوى و حاتم فتحى

هشام رحمة و مخلوف

أحمد حلمى و أحمد نادى

مين احسن وأسوء عميل

أسوء عميل اللى مابيبقاش عارف هوا عايز اية بالظبط و بييجى وقت الفلوس يعمل سنافر

وأحسن عميل اللى يسيبلى مجال الحرية اعمل و اسرح باستايلى و تفكيرى ف الشغل

ومايقوليش اية البنت دى فين مظاهر انوثتها مع العلم ان البنت اللى بيتكلم عليها دى شخصية لبنت لا تتعدى ال4 و 5 سنين و نظام الدفع المالى معاه مريح

ومين الرسام الي تحب تشترك معاه في عمل مشترك

تلاتة : أحمد عبد الوارث و عمر عادل و مخلوف

مين العميل الي نفسك تشتغل معاه ؟

مجلة سبيرو الفرنسية

أكتر حاجه بتحبها في الرسم ؟

الرسم فى حد ذاته بالنسبة لى أداة تواصل أكتر من رائعة و ساعات بتتفوق عندى عن الكلام … و لما اكتشفت مع الوقت ان الرسم بيدينى فرصة مابتكررش كتير للتأمل حبيته أكتر و أكتر .

في رائيك ايه المهارات المطلوبة علشان الرسام يكون محترم

1.

انه ما يسرقش شغل غيره … عشان يبقى محترم وسط الناس و حتى محترم بينه و بين نفسه على الاقل ..لأن مهما أى رسام بيحاول انه يسرق شغل غيره

صدقنى بيتعرف على طول و بكل سهولة … مفيش أسهل من كده

2.

تانى سبب ف اعتقادى عشان يبقى رسام محترم .. إنه يحاول يبقى ليه هدف

فى حياته من خلال الموهبة دى … و ده على فكره بيعطى عمر أطول لشغله أكتر مما ممكن أن يتخيل

3.

تالت سبب أنه يحاول يبقى تلقائى فى رسمه و يرسم اللى ف قلبه على طول ع الورق

بعيدا عن الرسم بتعمل ايه ؟

ههههه … بارسم برضه …. لكنى بأقضى معظم الوقت مع أهلى .. و بحب أوى ألعب مع ابنى ” عمر”.. وساعات بحاول نتقابل أنا و زمايلى

اكتر رسمه قريبه لقلبك ؟

كل شغلى بحبه جداً .. لأنى مؤمن بإن أى حاجة الانسان بيرسمها بتبقى محض فضل و نعمة من ربنا وعطاء منه سبحانه وتعالى … مش شطارة يعنى

 لكن من أكتر الرسومات القريبة من قلبى فعلاً هيّا الرسمة اللى بترسم بسمة على وجه أى انسان بيشوفها وخصوصاً الرسومات اللى بعملهل للسوبر هيرو بمعالجات مصرية

اسلوبك المفضل ؟

زى ما قلت لك يا عزيزى .. أنا عاشق للمدرسة الفرنسية و أوروبا الشرقية .. لبساطة وجمال خطوطها و عمق معناهاو تركيزها ع الناحية الانسانية اكتر من المدارس الامريكية و المانجا اليابانية . و بحب جداً استايل رسامين مصريين زى عمنا اللبّاد وحسن حاكم و حجازى و برجى و بهجت عثمان و وليد طاهر  و مؤخراً اكتشفت كنوز لفنانين عراقيين لللأسف لسه عارفها من وقت قريب بجد شئ رائع و مبهر

ناوي على ايه قدام ؟

كل خير إن شاء الله

!!… ان شاء الله افتح فرن و محل خردوات

يعنى زى ما تقول كده انا من اهدافى انى أنشر شغلى فى مجلة ” سبيرو ” الفرنسية .. و اعمل مؤسسة ضخمة تهتم بكل ما يمت بصلة للكوميكس و الرسوم المتحركة … و تبقى مصر مركز مهم للأنواع دى من الفنون

الاداة المفضله ليك ؟

قلمى و ورقتى و حمد الله على سلامتى

بس كده .. مادام فيه ورقة و قلم يبقى زى الفل

من ناحية البرامج

photoshop & Illustrator & Flash

ومفيش مانع من راديو صغنن كده و كوباية شاى ( و الكوباية تكون إزاز مش مج ) و ابقى قاعد كده فى حتة دوشة … ياسلاااااااام

ايه هوه الshortcut المفضل عندك

F5 عشان النت بيبقى رزل أوى ساعات

تحب تشارك بصورة للمكان الي انت شغال فيه ؟

مفيش مانع … أنا أى مكان اشتغلتفيه بياخد جزء من ذاكرتى و بيأثر فيّا بشكل أو بآخر … وانا من النوع اللى بيحترم الاماكن جدا و باحس بحميمة مع المكان وأخلليه منظم واحب جدا أظبط المكان اللى بشتغل فيه.. تحابيش كده من اللى قلبك يحبها ..بتخلينى أتشجع ع الشغل و بتوحيلى بأفكار كمان

في الاخر يا محمد تحب الناس تتابع شغلك فين او تتواصل معاك ازاي

: الموقع الرسمى

( تحت الانشاء ) www.tawfi2.com
صفحته على الدفيانت آرت
http://tawfi2.deviantart.com/
:الايميل
tawfi2a@gmail.com